Pantun Bahasa Banjar Romantis

Seputarbanjarmasin.com - Langsung aja nih admin mau share kumpulan pantun romantis dalam bahasa banjar yang di kutip dari beberapa sumber, semoga terhibur.

-------------------------------------------------

(Baca juga: Pantun Bahasa Banjar Lanji (18+))

Itik angsa itik japun,
Ayam kampung putih hintalunya,
Umai bungasnya pupur maambun,
Siapa jua nang ampunnya,

Manisnya mangga din darat,
Siapa jua ampun tanaman,
Manisnya ading batahi lalat,
Bulihkah abang batakun ngaran,

Maksud hati tulak maunjun,
Sayang kadada umpannya,
Amun bulih abang batakun,
Ading bungas siapa ampunnya,

Matan mana punai tarabang,
Matan jambatan nang batiti,
Matan mana datangnya sayang,
Matan mata turun ka hati,

Burung halang burung kaliyangan,
Tinggi tarabang ka angkasa,
Kambang mawar dalam jambangan,
Bulihkah kumbang hinggap di sana,

Lamun hari ngini hari jumahat,
Banyak haji babaju jubah,
Lamun ada cinta tatambat,
Cinta di hati jangan diubah,

Kambang mawar di pakarangan,
Kambang rampai baguyang-guyang,
Bamalaman manahan karindangan,
Mangganang ading nang disayang,

Nyaman mamakan karak nasi,
Makan karak batambah pulang,
Awan bajalan nang ditangisi,
Kakasih jauh di banua urang,

Asam pauh dalima pauh,
Rama rama batali banang,
Abang jauh ading gin jauh,
Sama-sama kita mangganang,

Matan rumah ka pasar hanyar,
Ular lidi masuk ka liang,
Bumi didabuk langit ditampar,
Si jantung hati diambil urang,

Malam ngini mamasak tungkul,
Isuk mamasak hundang galah,
Malam ngini kita bakumpul,
Isuk kita sudah bapisah,

Nukar sumangka di pasar kamis,
Dimakan baimbai dalam parahu,
Di luar tawa di dalam tangis,
Allah Ta'ala nang pasti tahu,

Tiup api di gunung lidang,
Habu habunya kutampi jua,
Niat hati salagi bujang,
Balu-balunya kuhadang jua,

Ada laus ada pang janar,
Gasan bumbu nintu gunanya,
Umai ading nang bungas langkar,
Bulihkah abang tahu ngarannya,

Waluh sabalah bayam saikat,
Gangan manis jadi masakan,
Hanyar sakali abang malihat,
Hati abang kada karuan,

Iwak haruan kulihan maunjun,
Tulak maunjun matan baisukan,
Lamun abang bulih batakun,
Siapa jua ampun larangan,

Kambang mawar harum baunya,
Putik satangkai jadi pajangan,
Hati abang liwar himungnya,
Ading bungas masih saurangan,

Kambang mawar makarlah sudah,
Banyak kumbang badatangan,
Abang supan handak bapadah,
Takutan batapuk sabalah tangan,

Kambang malati kambang mawar,
Kambang matahari kuning warnanya,
Makan haja tarasa hambar,
Lamun tabayang rupanya ading,

Buah nangka buah alpukat,
Tumbuh subur di tanah rata,
Bapijim mata tarasa barat,
Rupa ading di palupuk mata,

Mardu tadangar suara suling,
Mata rait balalu taguring,
Guring abang mamagut gaguling,
Asa abang mamagut ading,

Batang latung batang paikat,
Paikat malilit di puhun paring,
Rambut panjang maikal mayang,
Kaya putri matan kayangan,

Putik tujuh daun sirih,
Sampuk urat nang utama,
Muha putih mulus barasih,
Kaya malihat bulan purnama,

Simpun duduk basila di lantai,
Mandangar patuah abah tasayang,
Awak langsing tinggi samampai,
Pinggang halus sakacak lawang,

Bantang kain layar dibantang,
Tulak balayar ka pulau subarang,
Bibir tipis bagiuncu habang,
Hidung mancung nyaman dipandang,

Tabang paring diulah lanting,
Lanting ditambat di sungai paring,
Lamun sudah malihat ading,
Asa nyaman abang guring,

Tangan tacucuk mawar baduri,
Luka badarah balumlah karing,
Handak jua bawani diri,
Manjadi jantung hati si ading,

Tulak bagawi satiap hari,
Rajaki halal nang dicari,
Kadada janjiu nang abang bari,
Cinta sajati pasti dibari,

Ukur panjang mamakai dapa,
Dipakai urang matan bahari,
Jangan ading mamandang rupa,
Rupa bisa haja mambunguli,

Tulak ka kampung matan kuta,
Handak baburu burung balibis,
Jangan jua mamandang harta,
Harta di dunia bisa habis,

Pisang manurun diulah kolak,
Pisang dihiris dibalah-balah,
Lamujn ading mamandang akhlak,
Insya Allah mambawa barkah,

Aku tahu sarang wanyi,
Sarang wanyi di puhun jambu,
Aku tahu nang ikam handaki,
Nang dihandaki cucu panghulu,

Hibak sapah imbah manginang,
Bibir habang pina manarang,
Rasa lapah aku mangganang,
Nang diganang kada mangganang,

Ampun siapang hamburan gayang,
Jangan dibuang ka dalam batang,
Lamun yayang bujuran sayang,
Napa yayang balum badatang,

Jangan gayang buang ka batang,
Atawa di bawah tuyukan kayu,
Napa kanda balum badatang,
Pulau gatah baluman payu,

Patik kacapi iringi lagu,
Lagu matan bisikan kalbu,
Ampun hatiku apa habarmu,
Aku di siya tarus marindu,

Baju batik kain basulam,
Dipakai gasan pangantinan,
Duduk taungut di atas tilam,
Mangganang kanda sabaisukan,

Burung kalahiyang babuka halar,
Warna bulu mirip kutilang,
Uyy yayangku apa habar,
Rindu kaka sampai ka tulang,

Burung kalahiyang hinggap di tanah,
Handak mamakan daun tiwadak,
Lamun yayang handak ka rumah,
Bawa akan ulun wadai martabak,

Daging layat ngalih diigut,
Ngalih diigut tawak ka tawing,
Malam minggu duduk taungut,
Bakas kakasih isuk basanding,

Malihat almanak di hari sabtu,
Basiap diri aksi wan gaya,
Malihat jam mahitung waktu,
Bajanjian malming di dunia maya,

Tinggi tinggi si puhun pinang,
Tinggi tarabang si burung halang,
Mata tapijim hati mangganang,
Dandaman kanda di rantau urang,

Ampar tikar di atas gayang,
Hampang lalangit pasang di batang,
Biar bapangsar tatap ai sayang,
Dalas hangit kada mambuang,

Ka balakang rumah manabang paring,
Imbah ditabang lalu dibalah,
Asa supan aku maniring,
Gulu mahabang rambutnya basah,

Basapida mutur mereknya hunda,
Tulak satumat ka rumah hanapi,
Lamun cinta tatambat di dada,
Siang taganang malam tamimpi,

Sungai daras dalam banyunya,
Sambil balarut manajak lanting,
Babaya bungas umai sumbungnya,
Aku marawa inya bapaling,

Iwak cupang iwak kalatau,
Jantik jantik jadi pang umpan,
Hati pusang pikiran layau,
Handak batamu malapas dandaman,

Iwak haruan iwak saluang,
Umpani baras wan hulat bumbung,
Dalam mimpi tarus tabayang,
Ading nang bungas urang balitung,

Pisang kada sumbarang pisang,
Pisang ulih ulih matan jakarta,
Datang kada sumbarang datang,
Kaka datang mambawa cinta,

Handak kutabang si batang manggis,
Puhun manggis babuah jarang,
Kusayang bangat si ading manis,
Ading manis mamilih urang,

Malam isuk malam sabtu,
Malam isuknya malam minggu,
Tapuk bantal sambat ngaranku,
Di dalam mimpi kita batamu,

Jalan batiti turun ka batang,
Jangan bahindik titiannya patahan,
Bulan safar kanda badatang,
Bulan mulud kita banikahan,

Sakit mata talalu ditiringi,
Manuntun tipi layar sadapa,
Biar sajuta biunian mangulilingi,
Hatiku tatap sagan dinda,

Sungsungi guring jangan balandung,
Kaina bangunnya kasiangan,
Adinda batahi lalat di hidung,
Bakaning tabal kakanda dandaman,

Manis masam nangka kulanda,
Diulah jus liwar nyamannya,
Sahari kada batamu dinda,
Sarasa satahun manggaringnya,

Gatal takana batang kaladi,
Bahimat manggaru sampai badarah,
Basungsung hari sudah mandi,
Handak badadai di muka rumah,

Tagugur halang taranjah balam,
Wayah badua tarabangan,
Tabujur tahalang barabah di tilam,
Mangganang ading kada baguringan,

Maulah atang tatak bahalang,
Kayu maranti jadi pilihan,
Ulun datang handak bailang,
Handak mambawa’i ading bakunjangan,

Kayu katapi di higa buluh,
Kayu kuini di higa paring,
Kuparaki inya bajauh,
Kutakuni inya bapaling,

Burung piungut hinggap di tihang,
Tinggi di awan tarbang sakawan,
Duduk maungut basangga wihang,
Hati dandaman kupandang bulan,

Waluh masak nyaman digangan,
Sambal acan papuyu baubar,
Ulun dandaman ulun karindangan,
Saharian kakanda kadada habar,

Amun handak ka rumah nini,
Bawa baras dalam karanjang,
Amun pian sudah babini,
Kanapa jadi bapadah bujang,

Paraya pian bakaca mata,
Amun kada jua bajalanan,
Paraya abang bapadah cinta,
Mun kada wani ka palaminan,

Puhun mati dimakan binalu,
Putik binalu buat di kain,
Aduhayy hati tarasa pilu,
Malihat abang mangganding nang lain,

Ambil jamuran kain lalu dilipat,
Disusun rapi dalam karanjang,
Sudah lawas kita kada badapat,
Satiap hari hati mangganang,

Mati unggas ulih pamburu,
Unggas dibungkus dalam kain,
Hati panas rasa camburu,
Abang marayu binian lain,

Kuluk-kuluk harinya hujan,
Harinya hujan lakasi bataduhan,
Tuhuk sudah ulun manyandang,
Manyandang hati nang karindangan

sumber: http://machsada.blogspot.co.id